Երեքշաբթի, 16 սեպտեմբերին, Լիբանանի Վարչապետ Թամմամ Սալամ, հանրապետութեան միւֆթի հռչակեց
շէյխ Ապտել Լաթիֆ Տըրիանը, որ ապա պաշտօնական ձեռնարկի մը ընթացքին ստանձնեց իր պաշտօնը`
Պէյրութի Մոհամետ Ամին մզկիթին մէջ: Շէյխ Տըրիան իր արտասանած խօսքին մէջ, յայտնեց,
որ Լիբանանի հոգեւոր հաստատութիւնները հսկայ պատասխանատուութիւններ ունին` լիբանանցիներու
պաշտպանութեան առումով: Ան ընդգծեց, որ Լիբանանի մէջ կացութիւնը բարոյական ոճիրի հասած
է այն աստիճան, որ խորհրդարանը անկարող է հաւաքուելու եւ հանրապետութեան նախագահ մը ընտրելու,
հակառակ անոր որ խորհրդարանին հիմնական եւ առաջնահերթ պարտաւորութիւնն է ընտրել երկրին
հանրապետութեան նախագահը, որ արաբական աշխարհի միակ քրիստոնեայ նախագահն է: Շէյխ Տըրիան
նշեց նաեւ, որ Լիբանանի կառավարութիւնը անզօր է առեւանգուած զինուորները ազատ արձակելու
այնպիսի զինեալներէ, որոնք յանդգնութիւնը ունեցած են գլխատելու անոնցմէ ոմանք: Հանրապետութեան
միւֆթին ընդգծեց, որ այս բոլորը կը պատահին, որովհետեւ պետութիւնը անտեսուած է, եւ պետութեան
հեղինակութիւնն ու մարդ արարածին արժէքը անկարեւոր նկատուած են: Ան ընդգծեց Լիբանանի
ազգային միասնականութեան եւ համերաշխութեան ամրապնդման կարեւորութիւնը, ինչպէս նաեւ Թաէֆի
համաձայնագիրին կառչած մնալու անհրաժեշտութիւնը: Մարոնի համայնքի Պշարա Ռայի պատրիարքի
ներկայացուցիչ` Պէյրութի առաջնորդ Պուլոս Մաթար եպիսկոպոսը իր կարգին արտասանեց խօսք
մը, որուն մէջ ընդգծեց իսլամ-քրիստոնեայ համակեցութեան պահպանումը, որպէսզի Լիբանան կարենայ
դիմադրել իր ինքնութեան սպառնացող եւ դերակատարութիւնն ու պատգամը խզող վտանգներուն: